Akuzat e Doshit, Meta dëshmon në Prokurori dhe deklaron për median: Jam gati të ballafaqohem me Tomën dhe Berishën

Kreu i Kuvendit Ilir Meta është paraqitur në Prokurorinë e Krimeve te Renda, ashtu sikundër kishte konfirmuar edhe një dite me parë. Meta është paraqitur ne organin e akuzës ne oren 08.00 te mëngjesit të së premtes, thërritur për të dëshmuar lidhur me denoncimin e bërë nga deputetit Tom Doshi i cili ka akuzuar Ilir Metën se ka urdhëruar vrasjen e tij dhe të deputetit Mhill Fufi. Kreu i Kuvendit doli nga  Prokuroria e Krimeve të Rënda rreth orës 09: 30 minuta. Për gazetarët Ilir Meta tha: “Sapo përfundova dëshminë time me thirrjen e bërë nga Prokuroria e krimeve të Rënda. I jam përgjigjur pyetjeve të bëra nga prokurorët lidhur me pretendimet e zotit Doshi, për tentativën gjoja të vrasjes së 2 deputetëve. Dua të konfirmoj siç ia konfirmova prokurorëve gatishmërinë për të qenë në çdo moment dhe në çdo ditë në dispozicion të prokurorisë përveç të enjtes, në mënyrë që të bashkëpunoj me prokurorinë për hetimin e plotë të kësaj çështjeje duke iu nënshtruar ligjit dhe vetëm në respekt të tij. Videon e Tomës me Tomën për provë vetëm doktori mund ta marrë, ndërsa Toma si person përbën më shumë antiprovë se sa provë juridike. Kam shprehur gatishmërinë time në rast se prokuroria do e çmojë të arsyeshme të bëjë ballafaqim në prokurori me zotin Doshi e zotin Berisha dhe me cilindo që pretendon se ka prova që implikojnë këtë çështje.” - tha Meta

Më pas Kryetari i Kuvendit tha:  “Akuzat vijnë nga doktori tani, se Toma kaloi me doktorin, më parë kishte problemin me dy drejtoresha dhe ministrat, pasi grupi mori vendimin të mos pranonte shantazhin, dolën akuzat ndaj Metës. Por tani akuzat vijnë nga Berisha. Pavarësisht nga angazhimi I tij I jashtëzakonshëm në këtë çështje absurde unë do t’ia jap fjalën pa u kursyer e pa u lodhur”

l.v