“Panorama/ Policia pret “Tonin” në Rinas. Prokuroria: S’dhamë urdhër për shoqërimin e dëshmitarit

“Panorama” shkruan sot se pas mbërritjes në aeroport me avionin e ardhur nga Gjermania, Fatjon Skënderi është pritur nga efektiva të Policisë. Fajton Skënderi është personi i përmendur në deklaratat që ka dhenë në Prokurori deputetit Tom Doshi. Nuk ka qenë fjala për ndonjë urdhër ndalimi apo shoqërimi, por për masa sigurie. “Panorama” shkruan se burimet e saj të Policisë kanë thënë se një grup i efektivave të rendit kanë mbërritur në aeroport dhe kanë shoqëruar në drejtim të banesës së tij në Tiranë shtetasin Fatjon Skënderi. Sipas Policisë, shoqërimi është bërë mbi bazën e informacionit të marrë për kthimin e Skënderit në Shqipëri. Policia është angazhuar në pritjen dhe shoqërimin e dëshmitarit për shkak të sigurisë së tij. Ky fakt duket se është ndikuar nga një atentat i ndodhur në autostradën Tiranë­Durrës më 1 shtator 2014 kur pretendohet se ndaj automjetit të Fajton Skënderit është kryer një sulm, fatmirësisht pa pasoja.Po sipas  “Panoramës”  burime të Prokurorisë së Krimeve të Rënda kanë thënë dje se nuk kanë qenë në dijeni të shoqërimit të Skënderit me efektiva Policie dhe nuk kishin dhënë urdhër për një gjë të tillë.