“Hajde t’i fshijmë shpejt, se në Shqipëri qenka kollaj t’i mbulosh turpet!...”

Sot është 55 vjetori i Ardian Klosit. Gazeta Shekulli ka botuar me këtë rast një “In memoriam” dhe ka renditur një koleksion tekstesh mbi botën shqiptare të Klosit gjatë viteve. “Opinioni i vërtetë publik krijohet vetëm në raste ngjarjesh shumë të rënda, por jo si debat i vazhduar e real që bartet përmes mediave. Ndodh përkundrazi që mediat prodhojnë llafe, shpikin debate dhe e shuajnë debatin publik sapo që flaka e tij duket se mund të mbajë, - për t’u kthyer te tema e tyre më e dashur, surretërit e politikanëve.” – shkruante Klosi dhe citonte shkrimtarin austriak Jozef Rot i cili, pas një vizite në vendin tonë më 1927, shkruante: “Në Shqipëri nuk lejohet opinioni publik, por edhe po të lejohej, ai nuk do të ekzistonte.”

Ja një pjesë nga ato që janë përzgjedhur në botimin e sotëm: Titullohet “Si hyra unë në këto punë” dhe është e vitit “të largët” 1991:

 “....A mund të çlirohet vendi ndonjëherë nga ky tumor prej teritali gri? Libri i Sinishtës e kapërceu kufirin pa vështirësi, sepse kostumgrija që priste në port kishte bërë dikur gjimnazin me mua. Atë verë kuptova vërtet se çfarë monstrash pjell raca jonë dhe çfarë egërsie fshehin shqiptarët për njëri-tjetrin. Ajo që Sekretari i Parë diku e quajti "forca popullore", u derdh disa herë nëpër rrugët e Tiranës për të rrahur dhe kafshuar me dhëmbë gjakësorë qytetarët shqiptarë. Pushtetin e morëm me gjak dhe do ta lëshojmë vetëm me gjak. Në verën e `90 mund ta shikoje në mes të ditës rrugëve të Shqipërisë se çfarë quhej Diktaturë e Proletariatit (…) Refugjatët nuk e stërhollonin shumë etjen e tyre për liri; ata bërtisnin në oborr të ambasadës: "Dojçland, Dojçland" dhe natën i futnin duart edhe ndonjë femre. Ndërkaq neointelektualët, njëri pas tjetrit i dënonin ata në gazetat e moderuara të KQ dhe në sallat e Lidhjes së Shkrimtarëve, si huliganë pa moral. Sot sigurisht u vjen zor për ato deklarata, po, s’ka gjë, hajde t’i fshijmë shpejt, se në Shqipëri qenka kollaj t’i mbulosh turpet!...” (A.N.)