Mapo e AKZ i mbajnë gjilpërat majë për majë

Kopertina e numrit të fundit të Mapos, që është bërë e përmuajshme, është e pushtuar nga portreti i Kreshnik Spahiut, me flamurin kuqezi të lidhur si shall rreth qafës dhe me duart e kryqëzuara në gjoks në shenjë falenderimi e mirënjohjeje për ata që e mbështesin. Mapo promovon Spahiun? Jo, s’është kështu. Është krejt e kundërta, gjë që duket qysh në titullin e kopertinës që shoqëron këtë foto: “Projekti neo-otoman; aleanca kuq e zi, parti turke”. Dhe nëntitulli i përbërë nga disa pyetje: “Kush e mundësoi vizitën në Washington të Kreshnik Spahiut dhe kush e financon aleancën kuqezi? Kush është ndërmjetësi mes kreut të AKZ-së dhe interesave turke në Shqipëri?” Pas kësaj merret vesh thelbi i shkrimit në faqet e brendshme: Spahiu bën lojën turke në politikën shqiptare.

Spahiu ka reaguar ndaj këtij shkrimi, por edhe ndaj dyshimeve mbi financimin e kësaj aleance. Njëherë e ka bërë në studion e Ballës e njëherë tjetër në studion e Pezës. Dhe ka thënë se “aleanca financohet nga vetë aktivistët me anë të kuotave”. Ka sulmuar dhe kryeredaktorin e Mapos, Alfred Lelën.

Lela i jep përgjigje sot me anë të një shkrimi në Mapo (në të përditshmen). Dhe thotë se nuk është e vërtetë që “kartat e anëtarësimit në Aleancë kushtojnë 10 euro (gjë e pretenduar nga Spahiu), e rrjedhimisht financimi nuk bëhet nga shitja e këtyre kartave”. Në fund, ai ndalon tek një opinion apo aluzion i Spahiut, se “Lela ka bërë një shkrim me porosi kundër tij”. Lela i përmend dhe një shkrim shumë pozitiv të bërë një vit më parë (gjë që Spahiut i ka pëlqyer shumë), dhe sipas Lelës, “z. Spahiu kundërshton veten kur më paraqet, sipas volisë, glorifikues me bindje dhe rrënues me porosi”. Dhe saktëson: “Nëse në rastin e dytë porosia ka ardhur nga kryeministri Berisha, i bie që edhe në rastin e parë, atë të ‘heroizimit’ [të Spahiut], duhet ta kem pasur një shenjë nga dikush. Ose thjesht, siç edhe është e vërteta, në të dy rastet kam qenë duke ushtruar lirinë time dhe lirinë e shtypit për të shkruar mbi ngjarjet apo personazhet me atë informacion që kam pasur në dispozicion dhe pas përshtypjeve të mia.”

Re.Pu.