Një anektodë mbi Shqipërinë e rrëfyer nga një britanik

Në një shkrim të publikuar në numrin e sotëm të Mapos, Ndrek Gjini flet për një libër mbi Shqipërinë, me titull Land of Eagles, të publikuar në Angli, me autor Robin Hunbury-Tenison. Ky i fundit, ekplorator i njohur, ka qenë për një vizitë në Shqipëri. Në libër rrëfen një histori me ministrin shqiptar të kulturës të vitit 2007 (kush ka qenë ministër atëmot?).

Ngjarja është pak a shumë kjo: “Hunbury-Tenison po udhëtonte mbi kuaj, tok me të shoqen e me një shoqërues lokal, nga Thethi në Valbonë. Pak para muzgut, humbasin rrugën. Binte shi. Në një moment aty fanepsen disa fuoristrada, mes të cilave dhe një makinë policie. Karvani ndalet, dhe njëri nga udhëtarët që zbret nga një prej makinave prezantohet si ministri i kulturës. Shkëmbejnë ca fjalë, dhe dikush u tregon se nga shkohet për në bujtinën, ku miqtë e huaj kishin vendosur të kalonin natën. Dhe karvani vijon rrugën.

Turistët e huaj vijojnë rrugën, gjithashtu. Dhe mbërrijnë më në fund në bujtinë. Iu deshën dy orë të tjera për të arritur deri atje. Ishin të lagur, e të lodhur, por edhe të befasuar, pasi aty shohin që po darkonte ministri me të vetët. E gjithë vëmendja e të zotit të bujtinës është e përqendruar tek ministri, i cili ka rrëmbyer dhe telekomandën, dhe me të bën zapping, duke mos lënë askënd tjetër të shohë një program televiziv. Hëngrën darkë aty, por krejt të lënë pas dore, dhe me ushqime të ftohta që kishin mbetur pa u konsumuar prej tryezës së zhurmshme.”

Në këtë mes, më shumë se sa sjellja e ministrit me një ‘turist të rastit’ në atë hinterland, të bën përshtypje që vëmendja e njerëzve të shërbimit atjepari ish e thëthirë nga ministri e nga shpura e tij. Dhe fakti tjetër që ministri ish bërë pronar i telekomandës.

Re.Pu.