Panariti “rehabiliton” Lufrën: Nuk ka qumësht pluhur, do pija tre kuti po t’i kisha përpara

Në një dalje për mediat, Ministri i Bujqësisë Edmond Panariti ka hedhur poshtë të gjitha dyshimet për mashtrimin me qumështin “Lufra”. Ai tha se nga analizat e kryera në produktet e tregtuara nga kjo kompani, nuk ka rezultuar prani e qumështit pluhur, por vetëm qumësht i freskët.

 “Thamë se do të bëjmë analizat, dhe pas tyre ju bëj me dije se nuk ka prani të qumështit pluhur, por vetëm qumështi i freskët. Fakti se është gjetur një sasi e qumështit pluhur, dhe unë jam në dijeni, nuk ka asgjë të gabuar. Sepse importi i qumështit pluhur, është brenda normave. Kjo është një përpjekje e vazhdueshme për të futur në dorë subjektet tregtare. I rrezikshëm është qumështi në shishe plastike dhe jo ky. Unë nuk dua të bëj shou por po të kisha këtu përpara do të pija 3 kuti qumësh Lufra”, tha Panariti, duke u bërë një apel mediave, që në lidhje me ngritjen e aludimeve të tilla, të presin më parë analizat dhe ekspertizat. Kjo pasi siç tha Panariti, në këtë mënyrë dëmtohet subjekti dhe prodhimi shqiptar, dhe sipas tij ky është një rast i përsëritur.

Mbetet gjithsesi një pikëpyetje përse i duhej kësaj fabrike një sasi prej 1350 kg qumështi pluhur e cila nuk ishte e deklaruar as në faturat e TVSH dhe as në etiketat e produkteve, e gjetur nga policia e Fierit.

a.k