"Eksodi” i Vlorës, analisti A. Çipa e quan “atentat ndaj qeverisjes dhe institucionalizimit ligjor..."

Aleksandër Çipa shkruan sot në gazetën “Shqip” mbi ngjarjen e djeshme në Vlorë, ku disa qindra qytetarë u lëshuan në port për t’u larguar nga Shqipëria. E ndërkohë që sot botohej shkrimi i z. Çipa, policia e Vlorës, njoftonte arrestimin në këtë qytet, të disa punonjësve të një agjencie udhëtimesh, me akuzën se kanë falsifikuar dokumente, kanë mashtruar qytetarët dhe kanë ndihmuar në kalimin e paligjshëm të kufirit(http://www.balkanweb.com/site/vlore-tentative-eksodi-per-gje...). Pra kemi qindra qytetarë që duan të ikin, siç thotë Çipa ata janë nga periferia, pra duan të ikin për shkaqe ekonomike, kemi edhe ofertuesin që kërkon të përfitojë. Në fund është policia që ndërhyn. Mirëpo si e analizon analisti në fjalë ngjarjen e Vlorës? Ja disa pasazhe me mendimet e tij: “Ky lajm dhe ngjarja që lidhet me të, do të duhej të alarmonte së pari, gjithë sistemin zinxhir të institucioneve të sigurisë kombëtare...Në mënyrë të veçantë, mund të konsiderohet një atentat i pastër ndaj autoritetit të qeverisjes dhe institucionalizmit ligjor e shtetëror në pikat kufitare të vendit. Pas deklaratës së menjëhershme të Drejtorisë së Kufirit të Policisë së Shtetit, do të duhej të kishim gjatë 24 orëve reagime të vrullshme nga këshilli i Sigurisë Kombëtare, nga Komisioni Parlamentar për Mbrojtjen dhe Sigurinë Kombëtare, nga Ministria e Brendshme dhe natyrisht qeveria. Kjo duhet të ndodhë pashmangshmërisht, pasi në të kundërt, kërcënon besueshmërinë ndaj qeverisë dhe shtetit prej mediave ndërkombëtare dhe sidomos kancelarive të huaja e atyre fqinje. Një reagim kundër çdo tentative apo skenari dhe sidomos kategorikisht ndalimi i ekzilit masiv, duhet të bëhet jo për të privuar lëvizjen e lirë të qytetarëve, por për të mos krijuar artificialisht një kthim pas, të autoritetit dhe besueshmërisë ndaj shtetit tonë. Nuk është kjo gjendja. Modeli se si dhe si u projektua për të ndodhur është i njëjtë me atë të trafikimit, të firmave piramidale dhe mashtrimit tipik abuziv me psikologjinë dhe mendësinë e turmës rurale e periferike”. D.m.th, nëse kemi lexuar drejt mendimet e z. Çipa, këtu ka një skenar eventual, të mirëmenduar që synon të nxisë një eksod masiv, për ta konvertuar atë në një kolaps institucional, faturën e të cilit, me gjasë e paguan qeveria e sotme. Nuk mund të mos na bjerë në sy fakti sesi në renditjen e shkaqeve që çuan ata njerëz në portin e Vlorës dje, shkaku ekonomik, renditet si i fundit. Pra, këta që duan të ikin, janë të mashtruar fillimisht, pastaj hallexhinj. Dhe më tej, është e paqartë se çfarë qëndron pas idesë së z. Çipa për “reagime të vrullshme nga...këshilli i Sigurisë Kombëtare, nga Komisioni Parlamentar për Mbrojtjen dhe Sigurinë Kombëtare, nga Ministria e Brendshme dhe qeveria". Nëse do të ekstrapolojmë, nisur nga veprimet e deritanishme të qeverisë për dukuri të tjera, propozimi i Çipës, mund edhe të çojë në forcimin e Kodit Penal, në të cilin kalimi i kufirit mundet edhe të dënohet me burg. Njësoj si neni për arratisjen. Çipa flet për një ndalim kategorik të eksodit masiv, por është e vërtetë si drita e diellit, se eksodin masiv e ndalon vetëm ekonomia dhe jo aparati represiv apo shtrëngimi ligjor.
s.z