Hapja e dosjeve, flasin skeptikët e parë. Pobrati: Duhet kujdes. Braho: Për mua, nuk duhen hapur

Nuk është hera e parë që ndodh me çështjen e dosjeve të Sigurimit të Shtetit. Kur politika e shtron këtë temë, ka një entuziazëm fillestar për hapjen e dosjeve, kryesisht nga të rinjtë dhe njerëzit e zakonshëm. Pastaj vijnë zërat që këshillojnë të bëhet kujdes. Sot, Kryetari i Komisionit të Sigurisë, Spartak Braho, I intervistuar nga “Panorama” shprehet hapja e dosjeve cenon sigurinë kombëtare.

Duhet kujdes me dosjet e bashkëpunëtorëve të Sigurimit apo të zbulimit që  kanë qenë agjentë të dyfishtë.

Sipas tij, ligji i lustracionit që mund të miratohet nuk duhet të prekë profesionet, ndërsa propozon një strukturë të posaçme parlamentare sipas ligjit gjerman për hapjen e dosjeve, që do të shërbejë si filtri i parë i zbatimit të ligjit. “Unë tërë këtë histori, që për mua ka qenë një histori betejash politike, kam qenë i idesë që dosjet nuk duhen hapur. Por sa kohë që çështja ka evoluar, ku dhe e majta, dhe e djathta e kanë bërë kauzë dhe duan të provojnë se ç’duhet të arrijnë me hapjen e dosjeve, le t’i hapin”, ka thënë Braho.

Ndërkaq, në një intervistë për DITA-n, ish zyrtari i Sigurimit Luan Pobrati gjithashtu këshillon shumë kujdes nëse happen dosjet. Pobrati flet për filtrim të materialeve dhe personave. Por ndërkohë flet edhe për politikën  e sotme duke dhënë disa indicie që çojnë qartas tek emrat e atyre që janë pasuruar çuditshëm pas vitit 1990. Kështu, Pobrati përmend “ish sekretarë rinie nëpër rrethe, që mund të pretendojnë sot se pasurinë e kanë bërë me biznes, por mund të dalë që e kanë krijuar ndryshe…”.  

a.k