Liliana Hoxha: “Pozicioni i ambasadorit Arvizu për Enver Hoxhën, krejtësisht personal. Enver Hoxhën po e sjell politika dhe Arvizu e di shumë mirë”

Liliana Hoxha ka shkruar sot një opinion. Botuar nga “Gazeta Shqiptare” e që është edhe reagim ndaj deklaratave të ambasadorit Aleksandër Arvizu, që lidhet me portretet e Enver Hoxhës. “Si gjithë populli shqiptar jam tërësisht pro amerikane si mbështetësi kryesor i interesave tona. Tashmë që ideologjitë e vjetra kanë dalë jashtë funksionit (përveç çka ushqen terrorizmin), nuk besoj që Departamenti i SH.B.A-ve të preokupohet nga dy tre foto të Enver Hoxhës në një manifestim popullor nga ish-partizanë e bijtë e tyre me rastin e ceremonisë zyrtare për luftën nacional-çlirimtare, të cilën e udhëhoqi autoriteti në fjalë”, shkruan znj. Hoxha, për të vijuar më pas me idenë se “pozicionimi ekstrem i ambasadorit Arvizu në media, ishte pozicion krejtësisht personal”.  Dhe nga ky përcaktim që vjen në formë apeli, Hoxha bën një digresion për të theksuar se ajo që thotë  Arvizu, është fyerje për të gjithë ata shqiptarë që janë në nevojë dhe nuk kanë se ku të shkojnë. “Këta të zhgënjyer nga qeverisjet për njëzet e ca vjet, mbeten nostalgjikë ndaj Enver Hoxhës. Jo për ideologji, veç për sigurinë e jetës, për shkollimin e mjekimin e fëmijëve etj. Duke qenë krydiplomat si ambasador i SH.B.A-ve, qëndrimi i z.Arvizu është jo vetëm fyerje, por lëndim për shtresat në nevojë, që sot s’kanë as të hanë. S’kanë as ku të shkojnë, pikërisht ata të cilëve po ju prishen shtëpitë nga Rama, ndonëse ai ju pat premtuar në mënyrë proverbiale: “Nuk do të prish ndërtimet pa leje edhe sikur Enver Hoxha të ngrihet nga varri”! Shqiptarët po ecin përpara pa Enver Hoxhën. Është politika ajo që e sjell Enver Hoxhën në mes tyre për interesa, argumente apo për garanci politike, duke e stigmatizuar gjithmonë për keq. Ndaj z.Arvizu s’ka pse të shqetësohet, sepse gjithçka është “misse en scene” politike, metodologji të cilën ai si diplomat e njeh mirë. Z.Arvizu mbajti anën e oligarkisë politiko-mediatike e të biznesit”, thotë ajo ndër të tjera.  

http://www.balkanweb.com/analiza/2689/mos-fyej-z-arvizu--223552.html

s.z