Udhëzimi i Shkëlqim Canit dhe Edmond Haxhinastos: “10 euro tarifë për çdo qytetar që kalon me avion kufirin e Shqipërisë”

Ministri i Financave dhe ai i Transportit dhe Infrastrukturës, pra Shkëlqim Cani dhe Edmond Haxhinasto, kanë miratuar më datën 1 shtator të këtij viti një udhëzim që rregullon tarifën e shërbimit për kalimin me avion të kufirit të Republikës së Shqipërisë. Udhëzimi është publikuar në Fletoren Zyrtare. Ja pika 1: “Tarifat e shërbimit, për kalimin me avion të kufirit të Republikës së Shqipërisë, është 10 euro dhe paguhet nga udhëtari në momentin e blerjes së biletës, tek shoqëritë ajrore, pavarësisht vendit apo mënyrës së shitjes së biletës”. Ja edhe pika 2 që na qetëson të gjithëve se kjo tarifë shkon në buxhetin e shtetit, d.m.th shkon pak a shumë për të rregulluar punët tona prapë: “Tarifa e kalimit me avion të kufirit të Republikës së Shqipërisë është një pagesë e detyrueshme që bëhet për llogari të buxhetit të shtetit nga çdo udhëtar që del nga territori i Republikës së Shqipërisë në drejtim të destinacioneve jashtë, përveç rastit kur udhëtari është transit dhe nuk e kalon kufirin, por qëndron në ambientet e aeroportit deri në vazhdimin e udhëtimit të tij”. Pikat e tjera, në fjalë të përgjithshme kolaudojnë rregullat sesi të bëhet kjo pagesë dhe askush mos t’i shpëtojë asaj. E mbani mend taksën “Majko”? Ishte 10 mijë lekë (të vjetra) dhe merrej për rrugën Durrës-Kukës që nuk u ndërtua. Kjo merret për shërbimin që përfiton çdo fatlum që kalon mbi qiellin e Shqipërisë, ose më mirë që niset nga Rinasi.

s.z