Debat Rama-Braçe në grupin parlamentar, kryeministri i kërkon ndërprerjen e çështjes BSH, “Po heton prokuroria”

Dublimi i seancave dëgjimore të komisionit të ekonomisë, me hetimet e prokurirsë për çështjen e bankës Qëndrore, ka shkaktuar një debat në grupin parlamentar socialist mes Kryeministrit Rama dhe kryetarit të Komisionit Parlamentar të Ekonomisë, Erjon Braçe. Sipas “Panoramës”, Rama ka kërkuar nga Braçe që të ndërpresë seancat dëgjimore me anëtarët e Këshillit Mbikëqyrës të Bankës. Sipas Ramës, çështja tani ka kaluar nga kompetencat e Kuvendit, pasi është Prokuroria që po bën hetimin penal. Por kryetari i Komisionit të Ekonomisë, Braçe, nuk ishte dakord me këtë qëndrim të menjëhershëm të Kryeministrit, dhe ka kërkuar që seancat dëgjimore të anëtarëve të Këshillit Mbikëqyrës të vijojnë, pasi sipas tij ky është një detyrim ligjor i tyre për të informuar Kuvendin.
“Çështja e Bankës së Shqipërisë ka marrë rrugën e drejtësisë dhe duhet që Komisioni i Ekonomisë të ndërpresë seancën dëgjimore me anëtarët e Këshillit Mbikëqyrës. Tani e ka drejtësia në dorë dhe ne si politikë duhet të jemi larg”, ka kërkuar Rama. Por kryetari i Komisionit të Ekonomisë nuk ka qenë dakord me Kryeministrin dhe me tone të larta ka kërkuar vijimin e seancave dëgjimore. Panorama ka botuar edhe një dialog të detajuar Rama-Braçe, që vetë deputeti e ka përgënjeshtruar si të pavërtetë.

a.k