Vuçiç pret takim serioz me Ramën: Shqipëria është treg ideal për Serbinë

Kryeministri i Serbisë, Aleksandar Vuçiç duke folur nga Berlini për takimin me kryeministrin e Shqipërisë, Edi Rama në Beograd, që është parashikuar të zhvillohet më 22 tetor, ka deklaruar se mes tyre do të diskutohen“çështje serioze”.

“Do të jemi mikpritës të mirë. Do të diskutojmë çështje serioze dhe mendoj se kjo është një mundësi e madhe për kompanitë serbe. Është një mundësi për eksportet, sepse Shqipëria është një treg ideal për Serbinë”, tha Vuçiç, raporton "InSerbia".

Kryeministri serb ka theksuar se strategjia për të hyrë në tregun shqiptar duhet studiuar mirë. “Ekipi ynë do të krijojë një plan të detajuar me rezultate të përcaktuara dhe të qarta”, është shprehur ai.

Aktualisht Serbia është një nga dy vendet me eksportet më të mëdha në Kosovë dhe duket se, të njëjtën gjë po synon të bëjë edhe në Shqipëri.

Ky do të jetë takimi i parë i dy liderëve të këtyre vendeve në 68 vjet, që prej takimit të Josip Broz Tito me Enver Hoxhën në vitin 1946.

S.S