Kundërpërgjigjet ashpër Nikolla Gruevski ndaj qëndrimit të Edi Ramës. Madje me një parashikim provokues: “Rama nuk do të jetë gjatë kryeministër”

Qëndrimi i qeverisë shqitare për situatën e fundit në Maqedoni duket se nuk është pritur mirë nga partia qeverisëse e Nikolla Gruevskit. VMRNO-DPMNE e ka kapur si të gabuar dhe të pavend interpretimin e kryeministrit shqiptar Edi Rama, sipas të cilit protestat e fundit burojnë nga moszbatimi i Marrëveshjes së Ohrit. Madje në reagimin e vet VMRNO-DPMNE është shtyrë më tutje duke theksuar edhe një element që lidhety me zhvillimet e politikës së brendshme në Shqipëri, teksa thekson se “Rama nuk ka për të qenë gjatë kryeministër në Shqipëri. “Protestat radikale që po ndodhin këtyre ditëve në Maqedoni nuk kanë lidhje me Marrëveshjen e Ohrit, apo me marrëdhëniet ndëretnike. Përkundrazi organizatorët e këtyre protestave fshehin agjendën e tyre radikale, duke krijuar huti dhe duke mobilizuar më shumë përkrahës, duke gënjyer se i bëhen padrejtësi dhe po rrezikohen të drejtat e shqiptarëve. Këto protesta janë të motivuara dhe produkt i elementeve radikalë islamikë, që kundërshtojnë vendimin e gjykatës së pavarur për kryerjen e një vrasjeje makabre të pesë personave, prej të cilëve katër të rinj…Në kontekst të deklaratës së zotit Rama dhe duke marrë parasysh faktin se ai nuk do të jetë gjatë kryeministër i Republikës së Shqipërisë, i bëjmë thirrje që të bëjë një vizitë në mjediset ku jeton popullata etnike maqedonase në Shqipëri dhe të shohë kushtet në të cilat jetojnë ata dhe të bëj një paralele me kushtet në të cilat jetojnë shqiptarët në Republikën e Maqedonisë”, thuhet në deklaratën e VMRO-DPMNE. Nuk mund të mos konsiderohet se pas kësaj deklarate qëndron edhe konsensusi, apo përfshihet edhe qëndrimi i BDI-së së Ali Ahmetit, sa kohë që BDI-ja e ka moto zbatimin e Marrëveshjes së Ohrit, më saktë progresin në zbatimin e saj. Në çdo rast qëndrimi i Tiranës zyrtare ka provokuar një incident diplomatik, ose të paktën është marrë në këtë kontekst nga qeveria e Shkupit. Ndërkohë mediat shqiptare në Maqedoni vijojnë me supozime lidhur me atë që partia e Gruevskit e quan “axhendë e radikalëve islamikë”. Portali “Almakos” ka rimarrë disa informacione të botuara nga gazeta “Express”, sipas të cilave flamujt arabë në protestat shqiptare janë futur nga shërbimi sekret maqedonas. Mbetet për t’u parë tani sesi do të reagojë Tirana zyrtare, qoftë edhe vetëm p[ër frazën ku një parti që qeveris në Maqedoni hedh insinuata për mandatin e kryeministrit të Shqipërisë.

http://almakos.com/lajme/maqedoni/55554-sherbimi-sekret-maqedonas-ka-futur-flamujt-arab-ne-protestat-e-shqiptareve-ne-maqedoni.html

http://almakos.com/lajme/maqedoni/55551-gruevski-i-kunderpergjigjet-ashper-rames-nuk-do-jesh-gjate-kryeminister-i-shqiperise.htmlhttp://almakos.com/lajme/maqedoni/55551-gruevski-i-kunderpergjigjet-ashper-rames-nuk-do-jesh-gjate-kryeminister-i-shqiperise.html

s.z