Përplasja për gjyqësorin, PS-LSI paralajmërojnë ndërhyrjen e Parlamentit. Nga Presidenti ende asnjë reagim. Nishani përgjigjet vetëm për Gjykatën e Lartë

Dy partitë e koalicionit të majtë qeverisë, PS-ja dhe LSI-ja kanë paralajmëruar sot ndërhyrjen e parlamentit në çështjen e Këshillit të Lartë të Drejtësisë. “PS mbështet deklaratën e djeshme të Ministrit të Drejtësisë dhe të Qeverisë Shqiptare për të kërkuar ndërhyrjen e Parlamentit. Një rrjet gjyqtarësh të korruptuar që po kthehen në një sekt, që bëjnë gjithçka për të mbrojtur e shpëtuar njëri-tjetrin nga zullumet korruptive ku janë zhytur”, u shpreh sekretari Organizativ i PS-së, Blendi Klosi. Ndërkohë një nga drejtuesit e LSI_së, Ylli Manjani ka nënvizuar vendosjen e KLD-së në kushtet e antikushtetueshmërisë. “Ne jemi këtu të mbështesim të gjitha nismat politike dhe çdo nisëm tjetër në realizimin e reformës në drejtësi, për të vënë në vend misionin kushtetues të KLD-së dhe jo vetëm, por të krijimit të një sistemi gjyqësor dinjitoz, që të mos ketë më njerëz të korruptuar”, ka thënë Manjani. Në këtë kontekst mungon një qëndrim nga Presidenti i Republikës, i cili është edhe kryetar i KLD-së. Nisur nga fakti se po sot Presidenti ka dërguar një letër për drejtuesit e grupeve parlamentare të PS-së dhe LSI-së për çështjen e vendeve vakant në Gjykatën e Lartë, mund të konsiderohet se në planin politik mes shumicës dhe opozitës ka nisur përplasja e madhe për gjyqësorin.

s.z