50 mijë dollarë, makinë, 20 mijë dollarë-vlerat e dhuratave për gjyqtarët sipas ministrit të Drejtësisë

Gazetat kryesore shkruajnë sot të gjitha për mbledhjen e djeshme të Këshillit të Lartë të Drejtësisë, ku propozimet e ministrit të Drejtësisë Nasip Naço, u hodhën poshtë të gjitha. Po kështu dje bëri bujë dalja e Naços në media dhe denoncimi prej tij i veprimeve të KLD-së që është kthyer në kupolë mbrojtëse për gjyqësorin. Gjithësesi përcjellja e këtij informacioni që jepet sot në gazetat ka sidomos vlerë dhe interes publik të paktën në një pikë të deklaratave të Naços. Kështu gazeta “Panorama” citon ministrin të jetë shprehur se: “Njëri nga gjyqtarët pranoi se kishte marrë disa dhurata, një herë 50 mijë euro, një herë tjetër i kishin falur një makinë, një herë 20 mijë euro etj..”. Dhe më tej duke iu referuar padisë për një inspektor të KLD-së: “Si mund të hetojë kur ai inspektor ka 200 mijë apo 250 mijë dollarë ose euro të falura?!”. Ndonëse qeveritarët janë rekordi i këtyre pazareve, sërish shifrat e dhëna nga ministri flasin për një kastë të vërtetë në gjyqësor, e cila me këto shifra e ka ekspozuar veten dhe është vënë në pozita të një delegjitimimi total. Nuk është çudi që me këto shifra dikur të kemi edhe një parti për gjyqësorin, pasi iniciativa partish nga njerëz që kanë dalë nga gjyqësori janë parë.

s.z