Blushi: Nevoja e dy partive të mëdha për të bërë si njëra-tjetra është shumë e çuditshme

Deputeti i Partisë Socialiste, Ben Blushi, gjatë prezantimit të librit të tij “Hëna e Shqipërisë” në një takim me një grup studentësh, ka deklaruar se, policia është e gatshme për të ndërhyrë në Lazarat por Tahiri duhet të bindë Ramën për të ndërmarrë një veprim të tillë.

“Ministrin e Brendshëm unë e kam mik, e di që nuk ka frikë të hyjë në Lazarat. Absolutisht është shumë trim dhe e them sinqerisht këtë sepse e njoh. Por ka një problem. Duhet të bindë kryeministrin e vet që të hyjë në Lazarat se vetëm nuk mund të hyjë. Dhe ne tani duhet të presim derisa ministri i Brendshëm, që është shumë trim të bindë kryeministrin që të hyjë në Lazarat”, tha Blushi.

“Pse shteti pranon kapitullimin e vet. Unë nuk e pranoj këtë gjë, e refuzoj. Që shteti e di ku është krimi dhe thotë unë do hyj kur të bëhem gati. Po pse kur të bëhem gati? Çfarë na mungon ne? S’kemi ushtri? S’kemi polici? S’kemi opinion publik krejtësisht kundër? Opinioni publik është kundër Lazaratit”.

Sa i takon mënyrës se si PD po bën opozitë, Blushi thekson se ajo po bën gabimet që ka bërë PS gjatë qëndrimit në opozitë.

“PD ka dalë tani në opozitë. Në opozitë po bën në fakt të gjitha gjërat e këqija që kemi bërë ne kur ishim në opozitë. Që nga bojkoti i parlamentit tek greva para kryeministrisë, tek bllokimi i procesit të integrimit. Të gjitha këto i kemi bërë ne dhe ndaj ndenjëm 8 vjet në opozitë në fakt, sepse bëmë këto gjëra pa sens. Por nevoja prapë e theksoj e dy partive të mëdha për të bërë si njëra-tjetra është shumë e çuditshme”, ka deklaruar Blushi.