Rinasi rrëzon Berishën: Piloti italian u kontrollua në Rinas

Berisha shkruajti para dy ditësh në FaceBook: "Të dashur miq, burime serioze plotësisht të besueshme njoftojnë se piloti Reformato (rilindasi i Ramës), ka hyrë dhe dalë në aeroport nga dera e personelit duke shmangur kështu sistemin e kontrollit. Për të hyrë dhe dalë nga porta e personelit Reformaton e ka ndihmuar, me urdhër nga lart, në kundërshtim flagrant me ligjin, menaxheri i turnit të kompanisë së sigurisë së aeroportit ICTS, zoti Eno Bushi, ish-avokat i PS ne KQZ dhe bashkëshorti i znj. Johana Bushi, ish shefe e kabinetit të Edvin Kristaq Ramës si kryetar Bashkie dhe aktualisht zyrtare e lartë në Agjencinë Kombëtare të Transportit Ajror në Rinas”.

Pamjet e kamerave të sigurisë të areoportit të Tiranës tregojnë se avioni privat tip “Piper” ka mbërritur në Rinas më datë 8 maj. Në plane tregohet shoqërimi i avionit drejt vendit të parkimit, menjëherë pas uljes së tij në pistë.

Dy ditë më pas, më datë 10 maj, piloti italian Giorgio Riformato do të ngrihej në fluturimin e famshëm që përfundoi me uljen në rërën e Divjakës.

Riformato shfaqet në planet e kamerave të sigurisë, të filmuara ditën e shtunë, duke u kontrolluar nga personeli i Rinasit, i shoqëruar nga punonjësit e aeroportit.

Së bashku me të, në kontroll kalojnë edhe dy çantat aq shumë të diskutuara të Riformatos. Ndërsa Riformato kontrollohet edhe fizikisht nga personeli i sigurisë, çantat kalojnë skanerin dhe po ashtu kontrollohen.

Pas përfundimit të kontrollit, piloti italian dhe punonjësit e aeroportit shoqërojnë shtetasin italian në sallën e tranzitit dhe më pas deri në daljen 4.

Në orën 13:15, kamerat e sigurisë të aeroportit e tregojnë avionin që ecën në pistë për t’u përgatitur për t’u ngritur në fluturim, deri sa merr miratimin e kullës për tu ngritur në ajër në orën 13:26.

Pamjet janë tashmë të sekuestruara nga Prokuroria e Krimeve të Rënda në funksion të hetimeve për trafik droge në bashkëpunim të mbetur në tentativë.

Së bashku me to oficerët e policisë gjyqësore po kryejnë verifikime të mëtejshme, mes të cilave komunikimet mes pilotit dhe kullës, për t’u dhënë përgjigje momenteve kyçe të kësaj historie.

Re.Pu.

Video: http://www.top-channel.tv/artikull.php?id=277972&ref=fp