Një rast për të vlerësuar laicitetin e shkollës

Blogu “E-Zani” ka marrë në shqyrtim çështjen e laicitetit të teksteve shkollore, duke iu referuar abetares shqiptare. Është një diskutim që ende nuk po zhvillohet  në nivelin e duhur në Shqipëri, ndaj edhe ilustrimi me abetaren që sjell “EZ” paraqet  rëndësi. Bëhet fjalë për përfshirjen në abetaren shqiptare edhe të Nënë Terezës, e përcjellë me një foto dhe me disa fjali që e përshkruajnë atë si shenjtore dhe për veprat e saj si e këtillë. “Babi i tregon Zamirit për shenjtoren shqiptare, Nënë Terezën. Nënë Terezën e njeh gjithë e bota. Nënë Tereza kishte zemër të madhe. Gjithë jetën e saj ua kushtoi njerëzve të varfër. Ajo ndihmonte fëmijët e vuajtur. Sa e sa fëmijë ka shëruar ajo me zërin e saj të ëmbël”, është teksti në abetaren shqiptare. Ky tekst është përfshirë si ilustrues për gërmën “Z”,i shembullizuar me “Zemra e Nënë Terezës”. Tema është shumë e rëndësishme, pasi ai nuk lidhet vetëm me laicitetin, por edhe me penetrimin e përmbajtjeve politike në tekste të tjera shkollore, ku nuk mungojnë ilustrime me mjedise ku dominojnë banera partish të caktuara. Aq më i rëndësishëm është kujdesi për këtë, kur me ligj shkolla njihet si laike dhe për rrjedhojë, çdo tekst që hartohet nuk mundet të lejojë afilacione sado të vagullta në mendjen e fëmijëve.

s.z