Lefter Koka: Do lejojmë importin e plehrave. AKIP: Rama të distancohet nga këto deklarata

Ministri i Mjedisit, Lefter Koka ka lëshuar një deklaratë të fortë gjatë një intervistë për News24. Koka është shprehur se, pavarësisht që qeveria aktuale vendimin e parë që mori ishte pezullimi i importit të plehrave, kjo qeveri do të miratojë platformë për lejimin e importit.

Pas kësaj, Aleanca Kundër Importit të Plehrave (AKIP) ka reaguar duke kërkuar që kryeministri, Edi Rama të distancohet nga kjo deklaratë e ministrit.

“Rama të distancohet nga këto deklarata. Deklaratat e ministrit Koka në kundërshtim flagrant. Ndalimi i importit të plehrave ka qenë premtimi elektoral dhe vendimi i parë i qeverisë sapo erdhi në pushtet. Çdo tentativë për lejimin e importit do të kundërshtohet nga ne. Qeveria të reagojë dhe të distancohet nga çdo synim për të sjellë plehrat të huaja në Shqipëri”, thuhet në reagimin e AKIP-it. 

Në intervistën për News24, Koka u shpreh konkretisht:
Ne kemi qene që në momentin e parë për ndalimin e importit të mbetjeve. Nuk ka qenë qëllimi thjesht të ndalonim importin e mbetjeve. Bisedat me kryeministrin kanë qenë që në mënyrë të domosdoshme duhet të ndalojmë importin përderisa nuk kemi mundësi të dallojmë llojin e mbetjeve që importohen, nuk ka pasur sistem monitorimi në dogana. Tashmë mbetjet janë një nga llojet që mund të monitorohen. Shumë shpejt do jemi me një platformë për t’u thënë që ne tani jemi në gjendje të bëjmë këtë kontroll. Shumë biznese kanë investuar për përpunimin e disa mbetjeve të cilat fatkeqësisht me ndalimin e importit nuk kemi mundësi që këtë lëndë tua mundësojmë dhe ata këtë lëndë të parë e përpunojnë gjetkë.

S.S