Qeveria plan për shkurtimin e 40 mijë punonjësve të administratës publike?

Gazeta “Sot” shkruan rreth ekzistencës së një plani të qeverisë për shkurtime drastike në administratën publike. Sipas gazetës, mbi 40 mijë punonjës të administratës nuk do të paguhen më me paratë e taksapaguesve shqiptarë. “Nga 100 mijë punonjës që përbëhet aktualisht administrata publike, numri i punonjësve që do të firmosin në bordero në fund të muajit, pritet të shkojë në 60 mijë. Ky është urdhëri i lëshuar nga kryeministri Edi Rama për ministritë e linjës, Departamentin e Administratës Publike, drejtoritë kryesore, agjencitë e madhe dhe deputetët e Partisë Socialiste, në kuadër të premtimit para zgjedhjeve për të ndërtuar një administratë të depolitizuar, profesionale, efiçente dhe të vogël” shkruhet në artikullin e sotëm ku evidentohet fakti se lajmi konfirmohet nga deputetë të Partisë Socialiste, të cilët janë pjesë e diskutimeve dhe takimeve intensive në selinë rozë për reformën radikale në administratë.

Sipas burimeve, Departamenti i Administratës Publike, në bashkëpunim me ministritë e linjës, Këshillin e Ministrave dhe Ministrinë e Financave, duhet t’i paraqesë kryeministrit Rama, në një kohë sa më të shpejtë, raportin për strukturën dhe organikën e re të administratës shtetërore. Po sipas burimeve, objekt i fshesës së madhe në administratë, pikësëpari, do të jenë të punësuarit para zgjedhjeve të 23 Qershorit në këmbim të votës për Partinë Demokratike. Më pas, në fokus të fshesës, do të jenë militantët e emëruar prej vitesh në administratë, por që janë katapultuar në mënyrë të paligjshme. Në këto dy kategori mendohet se bëjnë pjesë mbi 20 mijë punonjës. Po ashtu, shkurtime drastike janё parashikuar në ushtri, diplomaci dhe agjenci të ndryshme, të varura nga qeveria.

Për më shumë:

http://www.sot.com.al/politike/qeveria-plan-p%C3%ABr-shkurtimin-e-40-mij%C3%AB-punonj%C3%ABsve-t%C3%AB-administrat%C3%ABs-rama-th%C3%ABrret-ministrat

k.k