Paketa Antikorrupsion, Naço: Megjithë rezervat e ndërkombëtarëve, do ta miratojmë

Paketa Antikorrupsion e përgatitur nga qeveria, ka hasur kundërshtime e vërejtje si nga OPDAT, misioni amerikan për drejtësinë penale, edhe nga OSBE-ja. Por në komisionin e ligjeve ministri i Drejtësisë Naço nuk pranoi asnjë nga vërejtjet e dy misioneve. Kështu, amerikanëve nuk u ka pëlqyer zgjerimi i kompetencave për Prokurorinë dhe Gjykatën e Krimeve të Rënda,  pasi ndër të tjera centralizimi rrezikon përdorimin politik. Por për ministrin, Prokuroria dhe Gjykata e Krimeve të Rënda janë histori suksesi; kjo paketë ka trembur disa që nuk flenë rehat dhe “besoj që nuk kanë për të fjetur rehat, se përsa kohë shteti është në këmbë, vonon, por nuk harron". Naço u tregua i palëkundur në fjalën e tij: “Unë do t'i falenderoj partnerët për ndihmën dhe kontributin që japin, por në fund të fundit janë prokurorët dhe gjyqtarët ata që do të zbatojnë ligjin. Ata nuk mund ta kuptojnë që një prokuror me presionin më të vogel mund ta dorëzojë detyrën në Vlorë dhe thotë të vijë ai nga Tirana, sepse unë nuk e bëj dot dhe nuk besoj që përqëndrimi në një dorë do të ketë ndikim politik", theksoi Naço.
a.k