R. Haradinaj përgënjeshtron median (në fakt, veten) pas deklaratës se “nuk di pse është mysliman”

Ramush Haradinaj nuk ka pritur gjatë për të bërë një hap prapa pas deklaratës që bëri, e që ne të respublica-s e raportuam gjatë paraditës së sotme. Nga një video që është publikuar, rezulton që ai të ketë thënë në një tubim se “familja ime për gjenerata ka qenë katolike; nuk di pse [duhet të jem] mysliman; kurrë nuk kam qenë në xhami”.  Ky qëndrim ka bërë shumë jehonë, dhe është pikërisht kjo jehonë që e ka bërë Haradinajn të urdhërojë zëdhënësit e partisë së tij të dalin me një deklaratë përgënjeshtrimi a saktësimi. “Fraza e Haradinajt është shkëputur nga konteksti”, është thënë në një deklaratë të AAK-së, dhe është vijuar: “[ky operacion mediatik] është bërë për qëllime spekulative”.

Në gazetën Express është publikuar dhe një opinion i Anton Berishës, i cili ka dashur qysh në titull që të minimizojë e zhvleftësojë efektin e deklaratës së Haradinajt. “Nuk e di pse jam katolik (mysliman)!?”, është titulli i këtij opinioni, në të cilin polemizohet me ata që janë ndalur më tepër se sa duhet tek kjo thënie e Haradinajt. Autori Anton Berisha është anëtar i kryesisë së AAK-së.

Re.Pu.