Përplasje në grupin parlamentar të PD-së, Topalli-Bashës: Nuk je i aftë të bësh opozitë dhe të udhëheqësh PD-në

Gjendja brenda Partisë Demokratike nuk është e qetë sa shihet me sy të lirë dhe jashtë kontureve të godinës së SHQUP, shkruan gazeta Shqiptarja.com, duke sjellë detaje të përplasjeve të grupeve që përpiqen të marrin dominancën në PD, të cilët avash-avash po ravijëzohen. Rasti më i fundit ka qenë ai i mbledhjes së grupit parlamentar të ditës së martë, mbledhje kjo jashtë rendit të ditës, ku ish-kryetarja e Kuvendit, aktualisht nënkryetare e PD dhe deputete e thjeshtë nuk ka kursyer akuzat ndaj kryetarit demokrat, njëherësh kryetar i bashkisë Lulzim Basha. Teksa i ka kujtuar dobësinë e të bërit opozitë, nënkryetarja e PD është shprehur se kjo dobësi mund te sjellë lënien për një kohë të gjatë të “Hakmarrjes për Drejtësi” nëpër këmbët e shqiptarëve. Kjo kritikë e ashpër është përsëritur edhe kur është shqyrtuar Korcca në mbledhje. Edhe në këtë rast, Topalli mësohet të ketë thënë në adresë të Lulzim Bashës, se nuk bëhet në këtë mënyrë opozitë. Ky është një opozitarizëm i dobët, pa asnjë argument dhe tepër e vakët për të sjellë ndryshimin dhe për të krijuar besim tek njerëzit se mund të kthehet PD dhe e djathta në pushtet. Më tej mësohet se Topalli i është drejtuar Bashës me këto fjalë: Je i paaftë të udhëheqësh PD dhe opozitën për të arritur grumbullimin e njerëzve rreth PD-së. Deklarata këto që nuk kanë marrë asnjë lloj reagimi nga ana e kreut të PD, Basha, por as nga drejtuesit e grupit parlamentar dhe deputetët e thjeshtë. Edhe Mesila Doda i është kundërvënë liderit demokrat Lulzim Basha, duke kërkuar që opozita të bëhet në Kuvend e jo jashtë tij, pasi kishin kritikuar dikur PS.

Zh.