Dosja siriane, thikë me dy presa - thotë gazetari që konsultoi Le Monde për intervistën me Bushatin

Qeveria shqiptare nuk mund të studjojë një kërkesë që s’i vjen zyrtarisht nga Këshilli i Sigurimit të OKB-së, tutelë për momentin e dosjes siriane - thotë gazetari Genc Burimi në një intervistë për Ditën, lidhur em debatin mbi asgjesimin e armëve kimike siriane në Shqipëri.

Burimi është konsulenti i gazetarit të Le Monde që intervistoi ministrin e jashtëm shqiptar Bushati gjatë vizitës së fundit në Francë.

Thotë Burimi: "Bushati e luajti pra shumë mirë rolin e tij si diplomat, ndaj botës, evitoi në mënyrë perfekte gafën jashtë (imagjinoni po të kishte thënë se amerikanët na kanë kërkuar një gjë të tillë, ne u jemi borxhli dhe jemi shumë krenarë për t’i ndihmuar). Por Bushati nuk llogariti ndoshta pasojat me opinionin e brendshëm në Shqipëri, ku një lloj fryme anti-amerikane duket sikur po ngre kokën, gjë që do të ishte katastrofike për marrëdheniet tona të privilegjuara me këtë superfuqi. Kjo dosje siriane është si ajo thika me dy presa për ne, me një kurth jashtë e një tjetër brenda. Veçse menaxhimi i situatës “brenda” nuk është më roli i Bushatit. Nëse lajmi rezulton i vërtetë, se Shqipërisë i duhet të përballet me stoqet kimike siriane, i takon Ministres së Mbrojtjes apo vetë kryeministrit të japin më shumë sqarime në opinion..." a.n.