Inflacioni i ulët, rritja ekonomike e ulët, Fullani nuk e ul normën e interesit…

Guvernatori i Bankës së Shqipërisë, në daljen e tij të djeshme para mediave, u shpreh se “ekonomia shqiptare është karakterizuar nga rritja e ngadaltë ekonomike dhe nga presione të ulëta inflacioniste gjatë vitit 2013. Rritja ekonomike u ngadalësua në 1.1 përqind në tremujorin e dytë të vitit, ndërkohë që informacionet e disponuara sugjerojnë për një aktivitet të dobët ekonomik edhe gjatë tremujorit të tretë. Ecuria e dobët e kërkesës private ka kompensuar impulset pozitive në rritje, të gjeneruara nga stimuli fiskal dhe nga kërkesa e huaj, në gjashtëmujorin e parë. Konsumi dhe investimet e sektorit privat vlerësohen të kenë patur një ecuri të dobët, ndërsa kërkesa e huaj ka vijuar të frenohet nga situata ekonomike e partnerëve tanë tregtarë”.

Sipas guvernatorit Ardian Fullani, presionet inflacioniste janë dhe do të vazhdojnë të ulëta, çka do të bëjnë që politika monetare të vazhdojë të jetë stimuluese dhe për periudhën në vijim, duke bërë të mundur ruajtjen e inflacionit në periudhë afatmesme.

Por politika monetare nuk vazhdoi të jetë stimuluese, edhe pse presionet inflacioniste janë dhe do të vazhdojnë të ulëta, edhe pse rritja ekonomike u ngadalësua në 1.1 përqind në tremujorin e dytë. Norma bazë e interesit, instrumenti kryesor monetar në duart i Bankës së Shqipërisë, nuk u ul poshtë nivelit 3.5%...

Një ulje e normës bazë të interesit mund të ulte koston e borxhit që merr qeveria në tregun e brendshëm financiar dhe koston e kredive bankare që mund të marrin bizneset dhe qytetarët.

E.Zaloshnja