Kujtimet e Fergusonit: Trimi Nemanja Vidiç, më 2009 mund të linte M.Utd për të shkuar në Kosovë!

Nuk është lajm i ri nacionalizmi i thekur, i sëmurë i serbëve, e aq më shumë i disa sportistëve të tyre me emër, të cilëve e ashtuquajtura kauzë kombëtare ua errëson shikimin dhe gjykimin. Ish futbollisti Sinisha Mihajlloviç ka patur disa shfaqje të këtij lloji. Por materiali më i freskët vjen nga libri me kujtime i trajnerit të njohur Sir Alex Ferguson, që ka bërë publike pjesët kryesore të autobiografisë. Disa nga zbulimet e ish-trajnerit të njohur janë debati me Bekam, pasi e goditi, largimi i Ronaldos, kërkesa e Runit për t’u larguar, debatet me Roi Kin etj, por më spektakolarja është kërkesa e mbrojtësit Nemanja Vidiç për të luftuar për Serbinë në Kosovë. Kush mendon se të paktën viti për të cilin bëhen fjalë, është lajthitje shtypi, mund të konsultojë sajtet në anglisht.
“Vidiç ishte i pa kompromis. Ishte serb krenar. Në vitin 2009, erdhi tek unë dhe tha “në Kosovë, duhet të shkoj atje. Është detyra ime”. Në sy e shihja që e mendonte vërtetë”, shkruan Ferguson në librin e tij. Nuk mund të mbetet pa u shtruar pyetja: Megjithë patriotizmin shembullor, pavarësisht faktit se këto personazhe nuk mendojnë sot e kësaj dite se serbët në Kosovë kanë bërë ndonjë padrejtësi; çfarë detyre historike do kryente Nemanja në vitin 2009, dy vjet pas shpalljes së pavarësisë së Kosovës? Ndoshta, ndonjë ofertë futbollistike e klubeve të Prishtinës.

a.k