Konflikti sirian. T.Shehu kërkon të mos rrihet duarkryq ndaj rreshtimit ekstremist islamik të ca shqiptarëve

Me “kredencialet” e ish ministrit të Jashtëm, deputeti demokrat Tritan Shehu ka shprehur së fundi shqetësimin e tij mbi lajmet e vazhdueshme që shohin përfshirje të shqiptarëve me forcat ekstreme islamike në Siri, që luftojnë regjimin e Bashar al Asadit. Duhet thënë se çështja në fjalë, është realisht për t’u shqetësuar. Shkruan Shehu në fb: “Disa ditë më parë takova në Romë një nga drejtuesit e rezistencës demokratike siriane, një personalitet demokrat, profesor, me ide krejt perëndimore. Me konfirmoi qartësisht dy elemente: 1- Shqiptarët autoktonë në Siri, në pjesën dërmuese të tyre, mbështesin lëvizjen demokratike aty. 2- Ka shqiptarë të tjerë, të vajtur aty mbas fillimit të konfliktit, edhe nga Shqipëria këta, që operojnë aty brenda formacioneve të forcave ekstremiste islamike, duke i krijuar një dëm të madh çështjes së atij populli”. Dhe Shehu shton se ky drejtues sirian i kërkoi të sensibilizohet opinioni publik në Shqipëri, Kosovë, Maqedoni, Mal i Zi, për këtë fenomen shumë të rrezikshëm, këtë trafik tragjik qeniesh njerëzore, organizatat kriminale që e organizojnë apo favorizojnë atë. Vetë deputeti i jep të drejtë, pasi “ne nuk mund e nuk duhet ta kalojmë me mendjelehtësi një shfaqje të tillë marrëzie, fatmirësisht për momentin shumë e kufizuar kjo. Një gjë e tillë bie krejt ndesh me aspiratat tona kombëtare, me përkatësinë tonë perëndimore, me angazhimet tona, me filozofinë e mentalitetin tonë fetar e njerëzor, me imazhin tonë, me interesat tona madhore”.

a.k