Aeroporti i ri i Prishtinës bëhet (pa u hapur) temë debatesh fetare

Terminali i vjetër i Aeroportit Ndërkombëtar “Adem Jashari” në Prishtinë për pak ditë do të zëvendësohet me terminalin e ri. Por një fotografi e publikuar në rrjetet sociale shkaktoi debat, pasi u mendua që kompania turke që po rindërton aeroportin kishte ndërtuar dhoma lutje vetëm për myzlimanët.

Është e përditshmja kosovare Express që është marrë me këtë temë. Ajo thotë se fotografia që u shpërnda në rrjetet sociale ishte vetëm për dhomat e faljes së udhëtarëve praktikantë të fesë myslimane, por ndërkohë kompania turke “Limak Kosovo” ka ndërtuar gjithsej tri dhoma të lutjeve brenda objektit të ri që do të inaugurohet këtë të mërkurë.

“Fillimisht është menduar se në terminalin e ri të Aeroportit Ndërkombëtar “Adem Jashari”, i është ndarë dhoma e lutjeve vetëm komunitetit mysliman. Por zëdhënësja e aeroportit Valentina Gara thotë se dhomat janë ndërtuar sipas një praktike që është nëpër të gjitha aeroportet moderne të Europës. “Janë tri dhoma të ndërtuara. Dy për besimtarët myslimanë pasi dihet që ata falen gratë veç e burrat veç dhe një dhomë tjetër për përkatësitë e tjera fetare”, thotë Gara për Express. a.n.