Një këshillë që duhet ta vlerësoni: Mendohuni mirë ku do t’i vazhdoni studimet e larta, rikuperimi i mëvonshëm është i vështirë!

DITA e djeshme botonte një shkrim që tërhiqte vëmendjen e maturantëve, studentëve të rinj dhe prindërve të interesuar për avenirin intelektual të fëmijëve të tyre në vazhdimin e studimeve të larta.  Nga 1350 programe studimi në total, rreth 680 u përkasin strukturave private, lulëzimi i të cilave ka marrë “hov” gjatë 4-5 viteve të fundit. Privati merr vetëm 15 për qind të studentëve që nuk sigurojnë dot një alternativë studimi në shtet, por kanë më shumë programe studimore se sa ofron publiku, çka vë në pikëpyetje jo vetëm cilësinë e tyre, por herë-herë edhe ligjshmërinë në ofrimin e studimeve, thuhet në shkrim.

Mijëra maturantë në të gjithë vendin janë mbërthyer nga ankthi se ku duhet të vijojnë studimet e larta, duke qenë se kuotat e përcaktuara për pranimet në universitetet publike janë të pamjaftueshme për të plotësuar kërkesat e të gjithave. Përballë mesazheve promocionale të shumta, ekspertët e Ministrisë së Arsimit sqarojnë për studentët që të jenë të kujdesshëm në rastet kur u drejtohen institucioneve të arsimit të lartë privat për të vijuar studimet e vitit të ri akademik.  “Prandaj, thonë ata, përpara zgjedhjes kërkoni nga shkolla e lartë vendimin për licencimin e programit të studimit, si dhe Urdhrin e Ministrit për akreditimin e programit. Sigurohuni që programi i studimit të jetë i akredituar përpara lëshimit të diplomës. Klikoni gjithmonë faqen e internetit të MASH http://www.mash.gov.al/ për të parë statusin ligjor të institucionit. Gjithashtu duhet të pyesni nëse kreditet (ECTS) që fitoni aty, janë të transferueshme në shkolla të tjera të larta brenda ose jashtë vendit”.

Besojmë se çka u tha më sipër është për t’u vlerësuar!...

Zh.