Shënim: 1 foto e Ramës baras me 1000 fjalë (të të tjerëve)

Duket se ka një ngut nga gazetarë që ose anojnë pak djathtas, ose thjesht nuk anojnë nga Rama për ta kritikuar sa më parë.madje, jo kritikuar, por për t'i treguar se si duhet ta bëjë shtetin.

Për fotot e Ramës të Kryeminsitrisë shkroi Blendi Fevziu, ku shpjegonte se godina u shkatërrua para Berishës (http://www.panorama.com.al/2013/09/28/rama-berisha-dhe-kryeministria/); Alfred Lela te MAPO, ku e akuzon se ka premtuar të mos mbledhë kapital politik të brendshëm duke publikuar foto (http://mapo.al/2013/09/28/mister-fotozhenia-ose-premtimi-pare-pambajtur-rames/); Preç Zogaj po te MAPO, që e akuzon se po i trajton ataqë mori votën si injorantë, sepse për këtë punë ua mori votën http://mapo.al/2013/09/28/fotot-e-postuara-nga-rama-nje-tallje-zgjedhesit/); më i butë disi Skënder Minxhozi te Shqip, që e quan 'shpenzim energjish' për të ekspozuar shëmtinë që ishte, dhe se shteti nuk është vetëm çështje imazhi (http://gazeta-shqip.com/lajme/2013/09/29/rreziku-qe-qendron-pas-manise-se-imazhit/); Mentor Kikia te G.Sh. e krahason me gjyqin e kafeve të Nexhmijes, dhe ndoshta një rrezik që 'drejtësia' do të ngelet me kaq, me publikimin e fotove (www.balkanweb.com/analiza/2689/gjyqi-i-kafeve-te-nexhmijes-dhe-vc-ja-allaturka-e-berishes-150675.html), etj. (Këta “etj”-ët janë kryesisht shkrues mirëfilli partiakë).

Ok. Ishin vetëm disa foto (dhjetëra, në fakt). Dhe qeveria ka vetëm disa ditë jetë. E drejtë, nuk janë fotot, por puna që do e tregojë. Por, të harxhohet kaq shumë hapësirë për të diskutuar, a, edhe sulmuar Ramën, pse publikoi ca foto, është së pari shpenzim shumë i madh letre.

Së dyti, duket se ka një mezipritshmëri për t'i rënë kokës kreut të ri të qeverisë. Në politikë ka njerëz që kanë hedhur një fshat në erë, dhe nuk mund t'i rezervojmë ca fotove të njëjtin reaksion (për atë fshatin, disa gazetarë e opinionistë edhe nuk kanë folur shumë). Ne duhet të heqim dorë nga praktikat ku dënojmë me 10 vjet një hajdut celularësh dhe me 2 vjet një vrasës. Fajet, sikurse krimet, kanë shkallë.

Së treti, duket se në këtë vend të gjithë (përfshirë dhe mua), mendojnë se e dinë sesi duhet bërë shteti dhe mezi presin t'ia tregojnë Ramës. Në këtë pikën e tretë, ata që duhet të heshtin më shumë janë ish-maxhoranca, sepse, na e treguan që nuk dinë si bëhet shteti. Dhe për këtë nuk kishim nevojë fare as për foto.

K. Cukali