“Agimsat” mbushin policinë greke; nis kundërsulmi ndaj neonazistëve

Opinioni grek është tronditur nga dëshmitë e disa anëtarëve anonimë të “Agimit të Artë”, që janë larguar të zhgënjyer prej saj sidomos pas vrasjes së këngëtarit grek Pavlos Fisas. Shtypi vendas po boton çdo ditë dëshmi dhe publikon video, ku bëhet fjalë për brigada ushtarake me rreth 3000 njerëz, të cilët stërviten për sulme mbi antifashistët dhe të huajt. Në video duken militantët që stërviten natën, me armë, të maskuar dhe mësojnë si të përdorin armët. Ata janë njerëz, që sipas shtypit, përdoren për “punë të pista”, siç ndodhi mbrëmjen e së mërkurës kur "skuadrat e vdekjes" vranë këngëtarin grek, Pavlos Fissas. Nisur nga një publikim në shtyp, sipas të cilit, pjesëtarë të “Agimit të Artë” stërviten nga oficerë aktivë të trupave speciale të Forcave të Armatosura greke, ministri i Mbrojtjes, Dimitris Avramopulos ka urdhëruar hetimin dhe zbulimin e përgjegjësive. Në vijim, dy hierarkë të rëndësishëm, drejtori i Përgjithshëm i Policisë së Greqisë së Jugut, lejtnant Janis Dikopulos dhe ai Greqisë Qendrore, Apostolos Kaskani dhanë dorëheqjen “për arsye personale”. Të tjerë drejtorë të policisë lokale janë pezulluar deri në përfundim të hetimeve.

Ndërkaq, kopertina e gazetës së të dielës Proto Thema, me foton e këngëtarit duke dhënë shpirt në krahët e të dashurës së tij, është denoncuar dhe dënuar rëndë nga opinioni grek dhe vetë familja e viktimës.

a.k