Bushati: Ndihmë nga BE për diplomacinë, dhe nga SHBA për ekspertizë strategjike

Ministri i Jashtëm Ditmir Bushati që ndodhet këto ditë në SHBA, ka dhënë një intervistë për Zërin e Amerikës, me gazetaren Laura Konda. Bushati është ndalur në dy momente: Në rikonceptimin e strukturës së shërbimit tonë diplomatik, dhe në rolin e SHBA-së për një projektim tjetër të faktorit shqiptar në rajon.

“Jemi në kontakte me shërbimin ndërkombëtar për shërbimin me jashtë. Është shefja e Politikës së Jashtme në BE, Catherine Ashton, e cila po na mbështet për këtë projekt të rëndësishëm. Ky shërbim duhet të rikonstruktohet", ka thënë Bushati, për të cilin “duhet racionalizim i pranisë tonë në botë, mënyrës se si do të bëjmë diplomaci. Duhet të shihet me sy të ftohtë, jo si një produkt shqiptar bio, por në marrëdhënie të ngushtë me ekspertët ndërkombëtarë që kanë përvojë në këtë drejtim". Ndërkaq, gazetaren e ka çuditur kërkesa drejtuar ambasadorit Arvizu për ekspertizë amerikane, ndaj dhe e shtroi këtë pyetje. Për Bushatin, “në të shkuarën ka pasur luhatje në marrdhënie me SHBA dhe nuk ka pasur konsultime mbi rajonin, ndaj i kam kërkuar zyrtarisht që të kemi një asistencë nga pala amerikane, që do na ndihmonte jo vetëm për bashkëpunim strategjik jo thjesht në rajon, por dhe arenën ndërkombëtare, si dhe për një projektim sa më të mirë të faktorit shqiptar në rajon”. Bushati ka sqaruar edhe “triumviratin” Itali-Greqi-Turqi si bashkëpunime plotësuese, dhe jo përjashtuese sa i takon Shqipërisë.

a.k