Vdekja false e 70 vjeçarit, dhe një pickim për shoqërinë që kemi ndërtuar

Historia e A1 Report ditën e sotme, me personazh 70 vjeçarin Hajdar Lila me origjinë nga Kruja, është komentuar gjerësisht në rrjet. Lila vendosi të shpallet vetë i vdekur vetëm që të afërmit e tij ta kujtonin e ta vizitonin. 70-vjeçari afishoi vdekjen e tij në mur, menjëherë pas ditëlindjes jubilare, për të parë a do kujtoheshin miqtë dhe të afërmit, të cilët i kujtonte me para dhe dhurata sa kohë që ishte emigrant në Kanada dhe punonte. Prej katër vitesh kur u kthye, pakkush e vizitonte. Kjo histori është zbatim real i skenarit të filmit të shkurtër “Vdekja e gjysh Trifonit”, nga i cili Lila mbase ka huazuar idenë. Por nga ana tjetër, 70-vjeçari tha për A1 Report se ka bërë gati edhe varrin e tij, prej 22 vjetësh madje, dhe në ceremoninë e vërtetë mortore nuk dëshiron të marrë pjesë askush, përveç bashkëshortes së tij dhe varrëmihësit. 

Në mos për gjë tjetër, publikimi i kësaj historie le të shërbejë si kujtesë për shoqërinë materialiste, cinike dhe individualiste që kemi ndërtuar.

a.k