Shënim: Kryeministri Edi Rama dhe Fate Velaj si një "institucion" më vete politiko-diplomatiko-kulturor në qeverinë e re

    Shënimi i mëposhtëm është pjesë e një komenti të ardhur mbrëmë në blogun e Respublica-s rreth lajmit “Rama merr këshilltar për “diplomaci kulturore” Fate Velajn, që gjerësisht mediat i referohen si “diplomati në Vjenë”. Autori i komentit flet se Edi Rama e nisi me CV e internet për punësime, por në fakt po e përfundon duke punësuar shokët e miqtë e tij. Një nga këta është edhe Fate Velaj, thotë autori, që në këtë rast është anonim, me pseudonimin “Zapbone”.

Më poshtë Zapbone shkruan: Fatmir Velaj këshilltar për diplomacinë kulturore! Po për diplomacinë kulturore, mor zoti Kryeministër ne na duhet një institut e nuk na duhet F. Velaj.  Ju mund ta bëni atë atshe kulturor, dhe kaq, po jo t’i jepni tagrin e një institucioni, dhe ky institucion duhet të jetë i pavarur. Ky institucion duhet të jetë akademik dhe i pa partishëm. Z. Kryeministër, janë paratë tona, janë paratë e popullit, janë paratë dhe të mijat që kam investuar gjithë shpenzime jetën time në Shqipëri, ku vetëm taksa e aeroportit shqiptar për biletë është 40 € si e asnjë aeroporti tjetër në Europe. Me një fjalë i gjithë principi i kulturës diplomatike do të trupezohet në një emër – Fate Velaj. Dhe ne duhet ta hamë këtë koqe ulliri. Me një fjalë e gjithë filozofia do të bazohet te Fate Velaj: i gjithë kuptimi, i gjithë dialogu, i gjithë besimi, i cili do të sigurojë partneritet të qëndrueshëm ndërmjet kulturave të kombeve për të nxitur mirëkuptimin reciprok e dialogun ndërmjet aktorëve diplomatikë dhe për të parandaluar shkuljen veshëve në auditorët diplomatike ka një emër . Dhe ky është Fate Velaj. Ju jeni trajneri i ekipit kombëtar të politikës së Shqiperisë. Ju do të aktivizoni skemën tuaj, po ju keni lënë në stol të rezervave shumë më të kualifikuar e profesionistë karriere, CV e të cilëve mbahen për t’u pirë lëngun. Ne na duhen projekte kreative të bëra nga një ekip dhe jo nga një njeri, sa do gjeni të jetë ai. Çfarë dialogu ndërkulturor ka bërë ky Fate Velaj. Dua të di nga ky gjeni Fate Velaj dhe nga vizioni magjik i Rilindjes si do të jetë komunikimi, si individ apo në përfaqësim kombëtar të shumë çështjeve të mpehta e të nxehta që janë në tapet me të gjithë fqinjët tanë, e sidomos me Greqinë. Vizionar i Rilindjes, Zoti Edi Rama, ne na duhet një institut për marrëdhëniet kulturore diplomatike për të zgjidhur problemet kombëtare e për të ndërtuar një strategji në marrëdheniet me fqinjët, që në Janinë të ketë simbolikë shqiptare përsa i përket kulturës që nga kështjella, te varrezat e zhdukura e deri te emri Ali pashë Tepelena, dhe jo varreza surreale greke me eshtra shqiptarësh, përfundon komentin Zapbone, të cilin në këtë rast, për qasjen që sjell, e kemi privilegjuar duke e vënë komentin e tij në rubrikën e lajmeve.

Zh.