Siria, po përgatitet sulmi. “Mos guxoni, do t’ju surprizojmë”, thotë Damasku

Po mblidhen retë e sulmit aleat mbi regjimin sirian. Gazeta Uashington Post njofton se

presidenti amerikan Obama po shqyrton mundësinë e një sulmi ushtarak mbi Damaskun. Por para kësaj, pritet që agjencitë amerikane të zbulimit të paraqesin informacione që mbështesin tezën e përdorimit të gazit kimik sarin nga ana e qeverisë Asad, duke përfshirë edhe përgjime telefonike ndërmjet komandantëve të ushtrisë siriane. Obamës i duhet një miratim nga Kongresi për ndërhyrjen ushtarake, sidomos në mungesë të një mandati nga Kombet e Bashkuara, pas refuzimit të fortë të Rusisë dhe Kinës.

Nga ana tjetër, CNN njofton se kryeministri britanik Kameron ka thirrur deputetët e parlamentit duke ua shkurtuar pushimet, në mënyrë që të votojnë për reagimin ushtarak ndaj Sirisë. Por pas deklaratës së sekretarit të Shtetit Xhon Kerri mbi armët kimike të regjimit të Damaskut, ka reaguar ministri i Jashtëm i Asadit, Ualid Moalem, që këmbënguli se armët kimike nuk janë përdorur nga qeveria, dhe ato po shërbejnë si sebep për ndërhyrje ushtarake. “Siria nuk është kafshatë e lehtë”, tha Moalem në një konferencë për shtyp, “ne i kemi mjetet për të mbrojtur veten. Të tjerët do të surprizohen”.

a.k