E djathja ka prekur fundin, thotë Dash Shehi. Dhe shton: “Duhen ide dhe personazhe të reja”

Dashamir Shehi i sugjeron Partisë Demokratike që të bëjë një opozitë të fortë dhe konstruktive, duke i përqëndruar të gjitha energjitë e saj tek reformat kushtetuese. Kreu i LZHK-së, i cili do të jetë deputet në legjislaturën e re, pikërisht nga listat e PD-së, thotë se ndërhyrjet në ligjin e zgjedhjeve dhe në ndarjen administrative të vendit janë të domosdoshme. “Çështjet kushtetuese, të administrimit të shtetit, ato elektorale dhe të administrimit të territorit të Shqipërisë duhet duhet të jenë flamujt e opozitës së re. Sigurisht, kjo nuk është e lehtë, sepse deri dje ishte qeverisëse“, është shprehur Shehi për televizionin “AS”. Por, për ta bërë këtë opozitë, sipas Shehit duhet një riorganizim i së djathtës me personazhe dhe ide te reja. “Kjo mazhorancë që ishte sot ka takuar fundin. Kaq poshtë nuk ka qenë ndonjëherë në 20 e ca vjet. Tani i takon ngjitja, por ngjitja do të bëhet me personazhe dhe ide të reja. Duhet të largohet nga kjo butafori politike, pak rurale”. Në fund, Shehi ka thënë se kryetari i ri i PD-së, Lulzim Basha i ka të gjitha mjetet e nevojshme për një opozitë të fortë, kurse për Berishën shprehet se “në një farë mënyre është larguar”.

Re.Pu