Përkujtimorja e Aristotel Gumës, “Agimi i Artë” deklarata antishqiptare në Himarë

Himara është rikthyer në qendër të vëmendjes mediatike sot, kur në tre vjetorin e vdekjes së Aristotel Gumës, minoritarit që u përplas nga një makinë, janë ngritur sërish tensionet në jug të vendit. Televizioni Neës 24 ka raportuar se eksponentë të partisë naziste greke “Agimi i Artë” kanë tentuar që të kryejnë rite brenda kishës në Himarë, por prifti është larguar. Më pas eksponentët e “Agimit të Artë” i janë drejtuar varrezave të fshatit dhe aty, pasi kanë shpalosur flamurin e Vorio- Epirit dhe “Agimit të Artë”, kanë lexuar një deklaratë antishqiptare. Madje, sipas televizionit, ekstremistët e Agimit të Artë kanë sulmuar edhe reporterët shqiptarë, që tentuan të filmojnë ngjarjen, ndërsa flitet se policia, edhe pse ka qenë e pranishme, nuk ka ndërhyrë. Vdekja e Aristotel Gumës ka prodhuar goxha tension në vitin 2010 dhe mbetet një çështje e nxehtë mes Shqipërisë dhe Greqisë.

Re.Pu