AFP: Kufoma shqiptarësh kthehen nga Siria. Kush ua “tregoi rrugën” për atje?

Para pak ditësh, “Zëri” botonte lajmin e një shqiptari nga Maqedonia që kishte rënë “hero” në Siri. Po dje, mediat sollën reportazhin e agjensisë AFP, që thoshte se dhjetëra shqiptarë janë bashkuar me rebelët në Siri, duke dhënë jetën kundër regjimit të presidentit Bashar al- Asad.

 “Shumë prej tyre kthehen në qese trupash pranë familjeve të tyre, të cilat nuk e dinë se ata janë bashkuar me rebelët në luftë” shkruan AFP, referuar nga TEMA, që sjell dhe disa raste konkrete:

“Migena Maliqaj, një shqiptare, nuk ka dëgjuar gjë nga i shoqi, Halili, që prej nëntorit, kur ai i tha se do largohej nga shtëpia, në Prush të Tiranës, për të gjetur punë në Turqi. Në qershor ajo mori një mesazh nga një numër i panjohur, ku i thuhej se Halili ishte vrarë në Siri. Nëna e Ermal Xhelos dëgjoi për angazhimin e djalit të saj në Siri vetëm kur trupi i 35 vjeçarit mbërriti në qytetin e lindjes, në Vlorë. Edhe ai kishte thënë se do shkonte të punonte në Turqi.”

“Nëse Rusia, Irani dhe Hezbollahu nuk hezitojnë të mbrojnë presidentin Asad dhe regjimin e tij, që vret njerëz, madje edhe fëmijë, pse duhet të hezitojmë ne që të ndihmojmë sirianët,” thotë për AFP një 40 vjeçar nga Podujeva, që po bëhet gati për të udhëtuar për në Siri.

Sa mund ta kuptojnë shqiptarët e fshatrave shqiptare realitetin e luftës siriane, aq sa për të mbajtur krah, e për më tepër për të dhënë jetën? Kush i “informon”? kush ua “tregon” rrugën drejt Sirisë? Kush ua mbush mendjen? Dhe për më tepër, si?

AFP vëren se familjet e të rënëve, por dhe autoritetet shqiptare refuzojnë të flasin për fenomenin.

k.c.

(në foto, shqiptari nga Maqedonia i vrarë para pak ditësh, Sami Abdullahu)