Azgan Haklaj “nuk duron dot më” dhe nxjerr në shesh “të palarat” e Olldashit e Patozit

Azgan Haklaj ka qenë deputet i PD-së në qarkun e Kukësit (Tropojë). Ai sot kish një shkrim të vetin në Shqip, një shkrim me titull “Epitafi politik i Astrit Patozit”. Është një shkrim idhnak dhe i dobët qoftë dhe për faktin se ushqen mendësitë e praktikat e denoncimit e linçimit moral e publik të tjetrit, në momentin që ky i fundit “tradhëton kauzën e përbashkët me ty”. Haklaj pra nuk bënte polemikë a debat me Patozin, por në thelb i thosh: “Ah, ti ike, tradhëtove, po qorton udhëheqësin tonë, partinë tonë? Epo mirë, tani po i themi botës se kush je ti”.

Dhe në këtë pikë, shkrimi i Haklajt bëhet interesant (nëse nuk bëhet fjalë për shpifje). Ai na thotë gjëra që nuk i dinim, e që as opozita e Edi Ramës nuk i ka denoncuar. Ai bën një resume të karrierës së Olldashit e Patozit, e quan këtë të dytin pseuodonimaxhi, i quan të dy produkte të kuzhinës së Mero Bazes e Ylli Rakipit, “dy njerëz të dobët që përdorën pabesisht aksesin e tyre në PD”, dhe më të fortën e ka lënë për në fund. I sugjeron Patozit që, sipas tij, ka qenë spiun i Sigurimit të Shtetit, ta lërë mandatin e deputetit. Dhe vijon: “Ke vende ku ta kalosh jetën. Ke restorantin luksoz që disponon në qendër të Tiranës. [Ke dhe] çifligun disa hektarësh të mikut tënd Olldashi dikund nga laguna e qetë e Baldushkut. “

Shkrimi i plotë, për ata që duan ta lexojnë, gjendet në linkun http://gazeta-shqip.com/lajme/2013/08/03/epitafi-politik-i-astrit-patozit/

Re.Pu.