Saimir Tahiri “fillon punën” si ministër i Brendshëm, komunikim me qytetarët në Facebook

Ministri i ri i Ministrisë së Brendshme iu ka kërkuar qytetarëve për të marrë të gjithë së bashku përgjegjësinë e institucionit që ai drejton. Ai ka thënë në një reagim në rrjetin social “Facebook” se qytetarët duhet të shprehin ankesat dhe sugjerimet në lidhje me Policinë e Shtetit.

“Policia e Shtetit duhet të jetë policia juaj! Ndaj nisni që sot e ndjehuni të lirë të më shkruani çdo sugjerim, çdo mendim, çdo eksperience tuajën personale prej të cilës mund të mësojmë diçka më shume nga ç’dimë sot, çdo iniciativë që në vlerësimin tuaj Policia e Shtetit duhet ta ketë ne axhendën prioritare. Pra gjithçka e vlerësoni të nevojshme për ta implementuar bashkë nga shtatori e tutje”! - shprehet Tahiri.

Tahiri në mesazhin drejtuar qytetarëve i ka shprehur falënderimet e tij dhe në të njëjtën kohë ka kërkuar ndjesë pasi i duhet të heq dorë nga posti i deputetit për të qenë ministër i Brendshëm. “Ndaj e ndjej detyrim t’iu drejtohem zgjedhësve të mi në Njësinë 6 e në gjithë Tiranen, miqtë e mi, jam e do jem gjithmonë aty me ju”, përfundon ai mesazhin.

Zh.