Shënim: Ftesa absurde për t’u qetësuar dhe menduar për turizmin, meqë vrasësi vlonjat “nuk e kishte me viktimat”

Seç ka një intonacion lehtësues e madje triumfator, sqarimi i policisë së Vlorës se masakra e plazhit është kryer për motive banale (disa djem fierakë hodhën ca fjalë në adresë të një vajze 19 vjeçare); se vrasësi, që nuk qenka 18 vjeçari i arrestuar Osmeni por një tjetër që po kërkohet, nuk e kishte me tre viktimat, por me këta djem; se të ndjerët janë vrarë nga plumba rikoshetë dhe jo direktë etj. Pra, tani duhet të qetësohemi dhe të vazhdojmë pushimet, është nënkuptimi. Në sherrin më të parë me fjalë, të rinj e mesoburra kapin armët, që ende janë sheshit, por ama duhet të mendojmë për avenirin e turizmit. Madje Kryetari i Operatorëve Turistikë për jugun, Vasil Bedini, në një prononcim për mediat ka theksuar se impakti i parë ka qenë negativ, por sipas tij “kjo ngjarje është e shkëputur dhe nuk duhet të ndikojë në ecurinë e turizmit, pasi Vlora” sipas tij “është një qytet me resurse të shumta dhe përtej bukurisë së plazheve, pastërtisë dhe qetësisë së tyre ka garantuar dëfrim 24 orë për pushuesit”. Dëfrim? Çfarë dreqin?

Para dy ditësh, një skaf i nisur nga brigjet pranë Vlorës ishte kapur nga roja italiane e financës, bashkë me ngarkesën e hashashit (mbi një ton) dhe drejtuesit e mjetit. Ky lajm nuk mbërriti në mediat tona, por ç’rëndësi ka; një skaf ndër të shumtët. Le të qetësohemi dhe të dëfrejmë.

A.K