Enver Hoxha: na, pushkatojini këta 30 vetë...

Liri Belishova mësohet të ketë dhënë një intervistë për albanologun Robert Elsie, që më 2011, dhe ky i fundit e ka botuar pikërisht tani. Është një rrëfim i sinqertë për ndjeshmëritë e një komunisteje të re, dhe për mënyrën sesi ëndërra u transformua në makth stalinist prej Enverit e të ngjashmëve si ai.

Ja 2 momente interesante nga kjo intervistë e rimarrë nga MAPO:

Partia Komuniste Shqiptare lindi si një parti staliniste, jo si partitë e tjera të Ballkanit dhe të Evropës që kanë një të kaluar social-demokrate që kanë patur një lëvizje sindikaliste, bile dhe një parti liberale. Ne lindëm si parti staliniste dhe edukata jonë ka qenë stalinizmi. Thuhesh leninizmi por në të vërtetë ishte stalinizmi. Kurse Marksi dhe Engelsi njiheshin shumë pak,  aq më tepër na thuhej se idetë e Marksit dhe Englesit do t’i marrim nëpërmjet Stalinit. Çdo gjë që bënte partia na dukej e drejtë dhe disiplina dhe edukimi ishte i atillë. U krijua kulti i Komitetit Qëndror të Partisë dhe i vetë partisë. Çfarë thoshte partia nuk diskutohej, ishte e drejtë dhe duhej zbatuar. Kështu që gabimet që bënte PK që gjatë kohës së luftës nuk ishim në gjendje t’i kuptonim.

...Gogo Nushi, duke qenë sekretar i parë i Tiranës kishte marrë nga Enver Hoxha një letër me një listë ku ishin rreth 30 veta me urdhër që të pushkatoheshin në mënyrë sekrete që të mos merrej vesh në publik që i vranë komunistët. Gogo Nushi tha: “Unë u habita se të tërë njerëzit që ishin në atë listë nuk ishin fashistë ose bashkëpunëtorë të pushtuesve, por ishin patriot të lidhur me Luftën Antifashiste, madje dhe komunistë. Enver Hoxha ka ndërhyrë dhe i ka thënë: “Ti vetë na ke shkruar dhe i ke kritikuar këta njerëz”. Gogo Nushi është përgjigjur: “Shoku Enver unë u kam shkruar se këta njerëz kanë disa gjëra të paqarta, disa pakënaqësi, me qëllim që ne t’i sqarojmë t’i bindim por jo t’i pushktatojmë...

k.c.

e plotë:

http://mapo.al/2013/07/25/liri-belishova-cna-ka-thene-enveri-per-bomben-ne-ambasaden-sovjetike/