Zhgënjimi, Olldashi ekspozon votën, hedh dy rromuze dhe largohet. Pritet numërimi

Kandidati Sokol Olldashi, mesa duket nuk zgjodhi më kot që të votojë në fund të ditës së zgjedhjeve për kryetarin e ri të PD-së, ndryshe nga rivali Basha që votoi paradite. Pasi ka ndjekur ecurinë e procesit, Olldashi u shpreh me një indinjatë të përmbajtur, mbi problemet me listat e anëtarëve të PD-së, duke u kërkuar ndjesë atyre që nuk votuan dot. Por jo vetëm kaq. Olldashi indirekt shprehu edhe pakënaqësinë për numrin rendor në fletën e votimit, duke identifikuar në mënyrë demonstrative fletën e tij. “Votova në fletën 411002,” tha Olldashi. Batuta tjetër e tij, ishte një falenderim “për të gjithë rivalët e mi”, një nënkuptim jo fort i zorshëm për mbështetjen e fuqishme që ka marrë Lulzim Basha nga kryetari Berisha dhe rrethi i tij. Olldashi ka nxjerrë disa piketa të vetat në fushatën demokrate, dhe mbështetja nga baza nuk i ka munguar, duke i krijuar bindjen se realisht mund të ketë shanse për të në këtë garim. Por zor se ka gjasa që rebelimi i tij të kalojë stadin e batutave.

A.K