Lajmi i mbrëmjes dihet qysh në mëngjes: Basha, kryetar i PD-së

Ajo që do ndodhë sot në PD është paralajmëruar nga media e gazeta afër Berishës, që kanë ndjekur gjatë gjithë kohës “strategjinë” e këtij të fundit, dmth nuk kanë mbajtur anë dukshëm, por nuk e kanë maskuar hiç tifozllëkun në favor të Bashës. Panorama i ka dhënë hapësirë Olldashit, por qartazi më pak se sa rivalit të tij. Mapo edhe sot dilte në faqe të parë me një foto të madhe të Bashës, sidoqë titulli ishte neutral: “Basha, opozitë të fortë; Olldashi; do fitojmë zgjedhjet më 2015”.

Por fundin e “garës” e ka paralajmëruar dhe fushata e Olldashit, e cila ka qenë e planifikuar qysh në krye të herës me objektivin për të dalë i dyti. Dhe mbyllet me këtë objektiv. Dje ish planifikuar një tubim i tij në pallatin e sportit Asllan Rusi, por ka qenë vetë kandidati Olldashi që e ka anuluar. Pse? E thotë ai vetë: “M’u duk jo e bukur për PD-në që paralelisht të mbaheshin dy tubime në të njëjtën kohë. Do dukej si ndarje demokratësh, por ne nuk kemi nevojë për këtë gjë” (!!!!)

Agjencitë e lajmeve mund ta raportojnë qysh tani lajmin e mbrëmjes: Kryetari i PD-së quhet Lulzim Basha. Madje, Mero Baze, një njohës i mirë i historisë dhe përplasjeve në PD, kish parathënë dhe rezultatin që, sipas tij, është pjesë e scriptit të garës: 67 me 33 përqind.

Re.Pu.