Votimet në PD, fleta me numër serie. Bie vota e fshehtë

Autoironia shpaloset me gjithë madhështinë e vet në zgjedhjet e Partisë Demokratike për kryetarin e ri. Dëshira e kryetarit “në largim” të partisë për të mbrojtur e numëruar çdo votë (deklaruar disa herë këto dy ditë nga Berisha lidhur me zgjedhjet parlamentare), ka marrë përmasa posesive kur vjen puna për votimet brenda partisë. “Hije manipulimi në PD”, thotë Shqiptarja.com, që ka hedhur online një fletë votimi të fotografuar, ku dallohet qartë numri i serisë së fletës, çka e skualifikon menjëherë kuptimin e votës së fshehtë. Kjo sepse shumë kollaj marrësi i fletës së votimit dhe zgjedhja që ka bërë ai mund të identifikohen më pas. Përtej problemeve me listat dhe mosgjetjen e emrit të shumë anëtarëve, kryeproblemi duket se është pikërisht ky: Drejtuesi në dritë i PD-së (që prej të nesërmes do të jetë shefi në hije), kërkon të dijë se sa dhe cilët votuan për këdo prej dy kandidatëve. Në fletën e votimit për zgjedhjet kombëtare (parlamentare apo pushtet vendor), numrin e serisë e përmban vetëm kondrabileta që i mbetet komisionit, jo ajo që i jepet votuesit.

A.K