Agron Tufa u fut spica personazheve të medias, dhe ndër ta veçon … Fevzin

Një shkrim i Agron Tufës, i publikuar online para ca ditësh, është rimarrë sot nga Tema. Në këtë shkrim, Tufa denoncon personazhet e medias, të cilët “e kanë pasur kohën e bollshme të na bindin, që i vetmi rol i tyre është jenë ‘viagra’ të pushteteve politike”. Dhe tek personazhet e medias sheh tre palë: “njëra e nxjerr karburantin e makinerisë së servilizmit nga pozita në pushtet, tjetra – nga opozita, [ndërsa] një palë të tretë, e cila në sajë të stazhit të gjatë të përvojës e ka pasuruar skemën, duke e nxjerrë karburantin edhe nga pozita edhe nga opozita”. Dhe këtu del në vendin, për ku është nisur qysh në fillim, tek Blendi Fevziu, të cilin e quan Fevzi (në trajtën e shquar). Thotë shumë gjëra për këtë “qerrata të madh”, por bie në sy një nënvizim i tij:

“[Fevzi] nuk i refuzon shtrimet e çështjeve të nxehta në studion e tij. Por ndryshe edhe nga ata, që nuk hezitojnë, më të rrallë, t’i shtrojnë çështjet e problematikat e mprehta publike për diskutim, Fevzi, këto çështje të zjarrta i sjell në studio për t’i fikur, apo më saktë, për t’i çaktivizuar. Kështu … Fevzi është marrë profesionalisht me çaktivizimin dhe çminimin e çdo problemi të madh që e mundon shoqërinë tonë. Duke i rënë nga dera e pasme problemeve të mëdha, Fevzi e ka pranuar bujarisht ndezjen e debatit, por ama me të njëjtët alihoxhë e hoxhalinj i ka çaktivizuar në mënyrë të përsosur, duke ua heqë tejzat e zërit, pa e shteruar asesi asnjërën prej tyre. Natyra bizarre e kësaj intence thotë kështu: ekzistojnë problemet? Bujrëm në studion time! Aty do të fitoni… memecërinë e sigurtë! Dhe njëmend përftohet diç e mjegullt: çështjet e nxehta shtrohen, për ta u fol dhe këtu përfundon misioni.”

Shkrimin e plotë mund ta gjeni në linkun  http://www.gazetastart.com/index.php?p=hg&hid=13094

Re.Pu.