Braçe: Po ristanizohet KQZ, Berisha po i vë zjarrin vendit. Bogdani dhe Bylykbashi: Leksion horrave të zgjedhjeve!...

Deputeti i Partisë Socialiste, Erion Braçe ka reaguar pas vendimit të Komisionit Qendror të Zgjedhjeve për të hapur kutitë në qarkun e Lezhës dhe të Shkodrës. Braçe tha se po ristanizohet KQZ dhe Berisha po ndryshon rezultatin në tavolinë siç bëri në vitin 2011.

“24 ditë pas dorëzimit të kutive me fletët e votimit në magazinat e tij e që administrohen nga ai: KQZ e Partisë Demokratike po ndryshon rezultatin e zgjedhjeve! Më qartë: pas 24 ditësh në bodrumet e tij, po gjen fletët e votimit që nuk i kanë gjetur 4 numërues e 7 komisionerë duke përfshirë dhe komisionerët dhe numëruesit e partisë e koalicionit të tij! Ky është krim. KQZ me katër njerëz, të gjithë të Partisë së Sali Berishës, përsëritës siç Osmani, Shtjefni e Zguri po ndryshon qartësisht vullnetin e zgjedhësve! Ky krim po shkatërron zgjedhjet dhe po e çon vendin drejt një konflikti që s’do ketë fund!”, thotë Braçe.

Por Oerd Bylykbashi, deputet i ardhshëm i PD dhe ekspert i çështjeve zgjedhore pranë kësaj partie, thotë se ky është një mësim që po u jepet horrave të zgjedhjeve. Manipulimet tregojnë qartë se fitorja e Partisë Socialiste bazohet tek paratë e trafiqeve dhe drogës, rinumërimi i shërben shërimit të proceseve zgjedhore, ka përfunduar ai. Nuk tha më shumë se kaq edhe deputeti tjetër i PD-së Gerti Bogdani, sot në një konferencë për shtyp.

Zh.