Basha dhe Olldashi, dy kandidatët që kërkojnë kreun e PD-së duke akuzuar Ramën

Nuk mund të mos vihet re fakti se në fjalët e tyre të përditshme, dy kandidatët kryesorë për Kryetar të Partisë Demokratike flasin gjithnjë e më pak për idetë se si do të sillen nesër në opozitë apo se çfarë do të bëjnë për ta rikthyer sa më shpejt në pushtet të djathtën. Por, në retorikën e Lulzim Bashës dhe Sokol Olldashit gjen gjithnjë e më shumë emrin e Edi Ramës. Olldashi thotë se Rama gënjen për taksat dhe shëndetësinë falas, ndërsa Basha i mëshon faktin se kryesocialisti ka mentalitet anti-shtet. Ata e akuzojnë për shumëçka, edhe pse ai ende nuk ka marrë asgjë në dorë e rrjedhimisht nuk mund të gjykohet ende se cilat premtime do të mbajë e cilat jo. Duket se shterpësia e ideve e të dy kandidatëve për ta ringritur nga rrënojat ku PD-ja ra në 23 qershor, i shpie ata të flasin më shumë për PS-në dhe Ramën se sa për vetë PD-në.

R.K