Meta shpjegon fitoren e së majtës: 1. Maxhoranca arrogante; 2. Vokacioni i majtë i shqiptarëve

Ilir Meta ka një shpjegim të tijin për rezultatin e 23 qershorit, më saktë për fitoren e së majtës. Dhe këtë shpjegim "analitik" e ka bërë në një intervistë për kanalin e ri televiziv“Agon Channel”. “Dihet që e majta në Shqipëri gjithmonë ka qenë shumicë. Dhe PD-ja ka arritur të qëndrojë në pushtet për shkak të ndarjes së të majtës në vitin 2005, por edhe në vitin 2009”, thotë fillimisht, dhe po aty hyn në kontekstin aktual dhe tek interpretimi i votës jo thjesht si njësi artimetike, por edhe si njësi emocioni e frymëzimi politik: “Natyrisht që në politikë nuk bëhet fjalë për shumica aritmetike, dhe dy plus dy nuk bëjnë gjithmonë katër, mund të bëjnë edhe gjashtë, që do të thotë se fryma dhe filozofia që tregohet mund të mbledhë shumë më tepër mbështetës dhe përkrahës se sa votuesit tradicionalë të partive të caktuara dhe natyrisht që kjo ndodhi edhe në këtë rast”.

Më poshtë kapet pas një detaji që ka të bëjë me këtë fushatë konkrete: “Një meritë të veçantë për këtë rezultat ka trysnia e madhe dhe arroganca e mazhorancës së mëparshme në raport me qytetarët. Ishte një trysni e padurueshme për qytetarët dhe një pjesë e mirë e tyre merrnin pjesë në mitingjet e Partisë Demokratike pa dëshirën e tyre, por sa më shumë detyroheshin të merrnin pjesë në mitingje aq më shumë bindeshin që te kutia e votimit duhet të votonin për opozitën, sepse pas 23 vjetësh kaq shumë politikë në jetën shoqërore, jetën sociale, në jetën familjare, në media ishte bërë një situatë e padurueshme. Dhe natyrisht që erdhi ky mesazh në mënyrë shumë qytetare, shumë të qetë dhe shumë të sigurt përmes votës. Unë asnjëherë nuk kam pasur frikë që do të ishte një fitore e ngushtë; përkundrazi kam pasur bindjen gjithmonë që opozita do të fitonte 80 mandate dhe këtë e kam shprehur që herët…”

Intervistën e plotë mund ta ndiqni në linkun http://www.gazetatema.net/web/2013/07/04/intervista-meta-qellimi-yne-eshte-bashkepunimi-ne-gjithe-jeten-politike-te-vendit-kushtetuta-te-kthehet-ashtu-sic-ishte/

Re.Pu.