Pjesë nga fjalimi i Berishës në Korçë [me disa saktësime tonat]

Berisha edhe në Korçë e filloi tubimin elektoral përmbyllës duke bërë viktimën:“[Edi rama] lakon emrin tim; le ta bëjë qindra e mijëra here”. Por … është hera e një por-i: “Por vetëm dy gjëra do t’i kërkoj; jo si kryeministër por si qytetar: zoti Rama, njeriu më i fuqishëm në Kongresin e Shteteve të Bashkuara, Dana Rohrabacher [këtu egzagjeron pak; pse na qenka më i rëndësishmi? Re.Pu.] ka kërkuar zyrtarisht hetim për ju për larje parash, për 80 mijë dollarë [Rohrabacher nuk flet për larje parash; larjet e parave kapin shifra të tjera, disa milionëshe. Re.Pu.]. Jepu shpjegim shqiptarëve! Shpjegohu, se me drejtësinë amerikane nuk bëhet shaka! Dinjiteti i shqiptarëve do të dijë të vërtetën që shtyn kongresmenin të kërkojë hetim për ty.”

Dhe pastaj, fillon e flet për veten, por në vetë të tretë: “Sali Berisha ka 20 vite rrogtar në politikë. Me të gjitha kursimet e tij ka arritur që një apartament 83 metër katrorë ta zëvendësojë me një 125 metra katrorë”. Dhe shton “duke e hapur zemrën”: “Kaq metra katrorë më mjaftojnë, por edhe po të mos mjaftonte, kaq ishin paratë e mia” [Po fëmijët tuaj sa metra katrorë kanë, zoti Berisha? Dhe sa metra katrorë kanë patur në vitin 2005? Po na sqaruat këtë, jemi ok. Re.Pu].

Pastaj kthehet sërish te Rama: “Ti po ndërton një vilë 57 metra të gjatë. Një pallat tjetër e ke në pajë, s’ke deklaruar asnjë gjë nga vijnë paratë që ndërton vilën 600 mijë euro. Je i detyruar të tregosh të ardhurat para shqiptarëve.”

Saktësimi i fundit: Ky Rohrabacher-i ka diçka të ngjashme me Trafficant-in e para disa viteve, që ish gjithashtu mik i ngushtë i Berishës. Në vitin 2005, sipas Los Angeles Times, ka shitur  23 mijë dollarë një skenar të vetin që rrinte prej 30 vitesh në sirtar. Ç’ka këtu? Nuk mund të ndodhë? Sigurisht, mund të ndodhë, por gazeta në fjalë ngre akuzën se producenti ia ka blerë kaq shumë atë skenar në këmbim të ca kontakteve me zyrtarë të shtetit federal e të Kongresit amerikan, që ia ka siguruar “njeriu më i rëndësishëm në Kongresin amerikan”. Me sa duket, ai momenti i dobët i veti e ka bërë të ndjeshëm ndaj dukurisë së blerjes së kontakteve me njerëz të rëndësishëm.

Re.Pu.